Ambasadori amerikan inkurajon Serbinë që të harmonizohet me Bashkimin Evropian dhe të vendosë sanksione ndaj Rusisë

Ambasadori amerikan inkurajon Serbinë që të harmonizohet me Bashkimin Evropian dhe të vendosë sanksione ndaj Rusisë

Prishtinë/Zagreb, 9 mars 2023 – Ambasadori amerikan në Beograd Christopher Hill inkurajoi Serbinë të enjten që t’i bashkohet vendeve perëndimore në lidhje me Rusinë dhe pushtimin e saj në Ukrainë dhe të harmonizojë politikën e saj të jashtme me Bashkimin Evropian, transmeton Hina.

Pothuajse të gjitha vendet e botës kanë mbajtur qëndrimin se Rusia nuk duhet të lejohet të vazhdojë të bëjë atë që po bën në Ukrainë, u tha Hill gazetarëve, duke shprehur shpresën se edhe Serbia do t’i bashkohet këtyre vendeve.

Nëse është e nevojshme të gëlltitet një pilulë e hidhur, është më mirë të bëhet tani, tha ambasadori amerikan në një bisedë me gazetarët gjatë një vizite në Institutin për Nënën dhe Fëmijën në Beogradin e Ri. Duke deklaruar se Serbia është në rrugën drejt Bashkimit Evropian (BE), Hill përsëriti mesazhet e mëparshme nga Brukseli për Beogradin se duhet të harmonizojë politikën e saj të jashtme dhe të sigurisë me Bashkimin.

Vlerësimi i mëparshëm i Hill-it se “Serbia vetëm vuan” nga shmangia për t’iu bashkuar masave të vendeve perëndimore ndaj Rusisë, u vlerësua nga opozita e djathtë si një paralajmërim i një hapi të ri politik nga qeveria e Aleksandër Vuçiqit. Krahu i djathtë në skenën politike serbe dhe ultra-nacionalistët e akuzojnë Vuçiqin se ka rënë dakord për vendosjen e sanksioneve kundër Rusisë dhe në këtë mënyrë “përmbush këtë kërkesë të Perëndimit” dhe se është pajtuar me “një politikë shantazhi që do të pasojë njërën pas tjetrës” dhe sa i përket pranimit të planit evropian për Kosovën, i cili sugjeron njohjen reciproke dhe anëtarësimin e Kosovës në organizatat ndërkombëtare.

Deri më tani, lideri serb Aleksandar Vuçiç ka injoruar thirrjet e shumta për të harmonizuar politikën e tij të jashtme me atë të BE-së dhe për të vendosur sanksione ndaj Rusisë, duke e justifikuar atë me marrëdhënie të ngushta dhe varësi nga burimet ruse të energjisë, por ai pranoi se në një moment do t’i duhet të pajtohen me kërkesat ndërkombëtare. [GN/ISHGJ]