Bashkimi Evropian premtoi mbështetje të fortë për Ukrainën, por jo pranimin e përshpejtuar

Bashkimi Evropian premtoi mbështetje të fortë për Ukrainën, por jo pranimin e përshpejtuar

Prishtinë/Zagreb, 4 shkurt – Të premten që lamë pas, Bashkimi Evropian premtoi mbështetje të fortë për Ukrainën në samitin në Kiev, por nuk caktoi “afate të mundshme” për anëtarësimin e vendit në bllok, transmeton Hina.

“Qëllimi ynë është të fillojmë negociatat këtë vit”, tha presidenti Volodymyr Zelenskiy, i cili shpresonte se Bashkimi Evropian do të ofronte një rrugë të përshpejtuar drejt anëtarësimit.

E pyetur për dinamikën e pranimit të Ukrainës në një konferencë të përbashkët shtypi, presidentja e Komisionit Evropian Ursula von der Leyen tha se “nuk ka afate të ngurta, por ka qëllime që Ukraina duhet t’i arrijë”. Megjithatë, ajo vlerësoi përpjekjet e Kievit në reformat që po kryhen “në përpikëri, si cilësore dhe shpejt”, duke i cilësuar këto përpjekje si “fenomene” në një kohë kur lufta është ndezur.

Në samit ishte edhe presidenti i Këshillit Evropian, Charles Michel, i cili tha se “e ardhmja e Ukrainës është në Bashkimin Evropian” dhe i bëri thirrje qeverisë që të punojë në forcimin e sundimit të ligjit. “Ne do të jemi me ju në çdo hap”, tha Michel. Deklarata e përbashkët përmendi vendosmërinë e Ukrainës për të filluar negociatat e pranimit sa më shpejt të jetë e mundur, por nuk përmendi një datë specifike. Për hapat e mëtejshëm të mundshëm në lidhje me anëtarësimin, “BE do të vendosë kur të plotësohen të gjitha kushtet e deklaruara në opinionin e Komisionit.”

“Ukraina ka theksuar vendosmërinë e saj për të përmbushur të gjitha kërkesat e nevojshme për të nisur sa më shpejt negociatat e anëtarësimit”, thuhet në deklaratë. Qershorin e kaluar, Bashkimi Evropian i dha Ukrainës statusin e një kandidati për anëtarësim në BE. Kievi aplikoi për anëtarësim katër ditë pas fillimit të pushtimit rus në fund të shkurtit. “Detyrat e shtëpisë” të Ukrainës përfshijnë reformimin e zgjedhjes së gjyqtarëve të gjykatës kushtetuese, forcimin e luftës kundër korrupsionit dhe pastrimit të parave dhe kufizimin e ndikimit të oligarkëve.

Në fund të një vizite dy-ditore në Kiev, von der Leyen dhe Michel theksuan mbështetjen e unifikuar të bllokut për Ukrainën ndërsa afrohet përvjetori i parë i pushtimit. “BE do t’ju mbështesë në çdo mënyrë të mundshme për aq kohë sa duhet,” tha Michel. “Kremlini nuk na pengoi dhe nuk do të na pengojë ta bëjmë këtë”, shtoi ai. Të tre zyrtarët diskutuan gjithashtu sanksionet e BE-së kundër Moskës, duke përfshirë paketën e dhjetë që Bashkimi planifikon të shpallë përpara përvjetorit të pushtimit. Opsionet për mbajtjen e Rusisë përgjegjëse për krimet e luftës, eksportet e grurit dhe rindërtimin e Ukrainës ishin ndër temat kryesore të takimit. [GN/ISHGJ]