Gjermania paralajmëron Serbinë: Zgjidhni mes BE-sëdhe Rusisë

Serbia tradicionalisht mban lidhje të ngushta me Rusinë. Nën dritën e  luftës në Ukrainë, qeveria federale tani po kërkon një vendim nga Serbia: për rrugën drejt BE-së ose një partneritet me Rusinë.

Prishtinë, 1 nëntor— Gjermania e ka paralajmëruar Serbinë për kultivimin e lidhjeve më të thella me Rusinë, duke paralajmëruar se ajo mund të pengojë përpjekjen e saj për t’u bashkuar me Bashkimin Evropian, tha të martën (1 nëntor) një burim i qeverisë gjermane.

Dy ditë para samitit të Ballkanit Perëndimor në kryeqytetin gjerman që synon të forcojë marrëdhëniet me gjashtë vendet e rajonit, zyrtari i lartë tha se Beogradi duhet të vendosë në anën e kujt ishte: Moskës apo BE-së.

“Marrëdhënia me Serbinë është komplekse – ka dritë dhe hije”, tha burimi, i cili foli në kushte anonimiteti.

“Marrëdhëniet e Serbisë me Rusinë janë sigurisht pjesë e hijeve”.

Burimi tha se qeveria gjermane ishte, për shembull, “e habitur dhe e zhgënjyer” kur Ministri i Jashtëm serb Nikola Selakoviç në shtator nënshkroi një marrëveshje me homologun e tij rus Sergei Lavrov, duke rënë dakord të bisedonte për politikën e jashtme.

Zyrtari gjerman tha se ishte koha që presidenti serb Aleksandar Vuçiç të çlirohet nga pozicioni i pengut.

“Nëse ai merr rrugën për në Evropë, ai do të ketë mbështetje nga BE si tërësi dhe nga qeveria gjermane”, tha burimi.

“Nëse ai zgjedh rrugën tjetër, kjo do të ketë pasoja” për të ardhmen e Beogradit me BE-në, tha zyrtari.

Serbia ka qenë kandidate për t’u anëtarësuar në Bashkimin Evropian që nga viti 2012, por perspektivat e saj shihen si të zymta pa normalizimin e marrëdhënieve me Kosovën. Beogradi nuk e pranon shpalljen e pavarësisë së Kosovës me shumicë shqiptare në vitin 2008.

Tensionet janë përkeqësuar nga lufta në Ukrainë, meqë më shumë serbë janë dashamirës ndaj aleatit tradicional – Rusisë.

Beogradi ka dënuar pushtimin e Ukrainës në Kombet e Bashkuara, por ka refuzuar të bashkohet me sanksionet evropiane ndaj Moskës.

Samiti i së enjtes në Berlin i organizuar nga kancelari gjerman Olaf Sholc do të mbledhë së bashku krerët e qeverive të Shqipërisë, Bosnjë-Hercegovinës, Kosovës, Maqedonisë së Veriut, Malit të Zi dhe Serbisë, si dhe liderët e BE-së.

Pjesëmarrësit nga Ballkani Perëndimor duhet të nënshkruajnë tri marrëveshje: për njohjen reciproke të dokumenteve të identitetit, atë të diplomave universitare dhe kredencialeve profesionale. [EurActiv/ISHGJ]