Kosova e sheh urgjente pranimin në NATO, formohet grupi punues për integrim

Kosova e sheh urgjente pranimin në NATO, formohet grupi punues për integrim

Prishtinë, 9 mars – Qeveria e Kosovës ka miratuar grupi punues ndër-institucional për integrim të Kosovës në NATO.

Ministrja e Punëve të Jashtme, Donika Gërvalla, e ka arsyetuar vendimin duke thënë se pranimi i Kosovës në NATO është urgjent.

“Kosova dhe shtetet tjera demokratike properëndimore në rajon po ballafaqohen çdo ditë e më shumë me veprime destabilizuese të provokuara nga Rusia, përmes vartësve të saj. Duke marrë parasysh kontekstin aktual të agresionit të paprecedentë rus ndaj Ukrainës, dhe synimeve për destabilizim dhe minim të progreseve euroatlantike e kërcënim për paqen globale, anëtarësimi i Kosovës në NATO është urgjent si rrallëherë më parë për solidifikimin e arkitekturës së sigurisë në rajon dhe Evropë”, ka thënë ajo në mbledhjen e Qeverisë.

Ministrja e Jashtme do të jetë kryesuese e këtij grupi, ndërsa anëtarë do të jenë ministri i Mbrojtjes, ai i Brendshëm, ai i Drejtësisë, ndërsa përfaqësues do të ketë nga Presidenca, Kryeministria, Ambasada e Kosovës në Bruksel dhe ajo në SHBA.

Objektivat e këtij grupi janë avancimi i procedurave për pranim në NATO, përfshirja sa më e shpejt e Kosovës në partneritetin për paqe, anëtarësimi në Kartën e Adriatikut A5, fuqizimi i pranisë së Kosovës në mekanizmat ndërkombëtarë të sigurisë dhe intensifikimi i bashkëpunimit me aleatët strategjikë [Koha.net/ISHGJ]