Presidenti sirian Assad thotë se bazat ruse dhe ushtarët rusë janë të mirëseardhura

Presidenti sirian Assad thotë se bazat ruse dhe ushtarët rusë janë të mirëseardhura

Prishtinë/Zagreb, 16 mars 2023 – Presidenti sirian Bashar Al-Assad tha në një intervistë të publikuar sot në mëngjes se, ai do të mirëpriste çdo propozim rus për ngritjen e bazave të reja ushtarake dhe rritjen e numrit të trupave ruse në Siri. Assad, i cili foli me presidentin rus Vladimir Putin në Moskë, tha se prania ushtarake e Rusisë në Siri nuk duhet të jetë e përkohshme. “Ne besojmë se nëse Rusia ka dëshirë të zgjerojë bazat ose të rrisë numrin e tyre, kjo është një çështje teknike ose logjistike. Nëse ekziston një dëshirë e tillë, atëherë ne mendojmë se zgjerimi i pranisë ruse në Siri është një gjë e mirë…”, citohet ai nga agjencia shtetërore ruse e lajmeve RIA.

Rusia ka një prani të konsiderueshme ushtarake në Siri dhe është një aleat i ngushtë i Asadit, duke mbështetur qeverinë e tij në luftën civile shumëvjeçare të vendit, duke nisur sulme në zonat e kontrolluara nga opozita. Mbështetja ushtarake e Moskës për Assadin e ndihmoi atë të kthente valën e luftës që filloi në vitin 2011. Siria, me mbivendosjet e saj historike etnike, është bërë kryqëzimi i sferave të influencës amerikane, ruse, iraniane, turke dhe izraelite. Rusia dhe qeveria në Damask planifikojnë të nënshkruajnë një marrëveshje për bashkëpunim ekonomik në javët e ardhshme, raporton RIA fjalët e Asadit.

Në fund të dhjetorit 2017, ministri rus i Mbrojtjes tha se ushtria ruse kishte eliminuar disa mijëra terroristë, ndërsa 48,000 anëtarë të forcave të armatosura ruse kishin “fituar përvojë luftarake” gjatë operacionit rus në Siri. Megjithatë, duket se ushtria ruse ka tërhequr një numër të konsiderueshëm trupash dhe pajisjesh ushtarake në Siri për të marrë pjesë në luftën në Ukrainë. Dy bazat më të mëdha ruse në Siri janë baza detare e Tartusit dhe baza ajrore Hmeimim. [GN/ISHGJ]