Sulmi izraelit me snajper ndaj deputetit sirian në Siri: një shenjë e politikës së re izraelite në rajon?

Sulmi izraelit me snajper ndaj deputetit sirian në Siri: një shenjë e politikës së re izraelite në rajon?

Prishtinë, 17 tetor – Vdekja e një ish -deputeti sirian, i përkatësisë etnike druze, gjoja nën zjarrin e snajperit izraelit, mund të shënojë një fazë të re në luftën izraelite kundër ndikimit iranian në Sirinë fqinje, raporton AP.

Agjencia siriane e lajmeve SANA raportoi se, Midhat Saleh, u vra të shtunën në Ein el-Tinneh, një fshat përgjatë kufirit izraelit në Lartësitë Golan, ku drejtonte zyrën e qeverisë siriane. R përditshmja izraelite Haaretz njoftoi se Saleh po ndihmonte ushtrinë iraniane kundër Izraelit.

Ushtria izraelite nuk pranoi të komentojë mbi akuzat, por nëse pretendimi sirian është i saktë, do të ishte hera e parë që snajperët izraelitë kanë vrarë një objektiv të lidhur me Iranin përtej kufirit. Izraeli ka thënë se nuk do të tolerojë një prani të përhershme ushtarake iraniane në Siri dhe ka pranuar se ka kryer një seri sulmesh ajrore mbi anijet dhe objektivat ushtarake iraniane në Siri vitet e fundit.

Izraeli pushtoi Lartësitë Golan nga Siria në luftën në Lindjen e Mesme në 1967, dhe më vonë e aneksoi atë. Shumica e botës nuk e njeh aneksimin, edhe pse administrata Trump e ka shpallur territorin pjesë të Izraelit.

Saleh lindi në Majdal Shams, në anën e Golanit nën kontrollin izraelit, dhe Izraeli e arrestoi atë disa herë. Ai më vonë u transferua në Siri, u zgjodh në parlament në 1998 dhe ishte këshilltar i qeverisë për çështjen e Golanit. Komuniteti i vogël druzë që jeton në anën e Golanit nën kontrollin izraelit, në përgjithësi ka marrëdhënie të mira me Izraelin. Por shumë anëtarë vazhdojnë të pretendojnë se janë besnikë ndaj Sirisë, pjesërisht sepse kanë të afërm në anën tjetër të kufirit. Samih Ayoub, një banor i anës izraelite të Golanit, tha se Saleh “nuk ka të bëjë” me Iranin ose ndonjë fraksion militant. “Ai ishte thjesht një njeri i qetë që punonte në një zyrë. Ai u vra pranë shtëpisë së tij”, tha ai.

Edhe pse nuk kishte komente zyrtare nga Izraeli, analistët ushtarakë izraelitë, të cilët kanë takime anonime të nivelit të lartë me ushtrinë, thanë se Saleh ishte mjaft i përfshirë në ndihmën e iranianëve. Irani ka dërguar mijëra forca në Siri për të mbështetur ushtrinë e Presidentit Bashar Al Assad gjatë dekadës së luftës civile në vend. “Ai iu përgjigj drejtpërdrejt iranianëve,” tha Yossi Yehoshua, një korrespondent ushtarak për Yediot Ahronot, gazeta më e madhe ditore e Izraelit.
                                                                                                [Gepolitika news/ ISHGJ]