Tregjet financiare: Wall Street ra për të dytën ditë radhazi

Tregjet financiare: Wall Street ra për të dytën ditë radhazi

Prishtinë/Zagreb, 07 shkurt 2023 – Në Wall Street, çmimet e aksioneve ranë për të dytën ditë radhazi të hënën, pasi investitorët kanë frikë se një treg i fortë i punës do ta shtyjë bankën qendrore të SHBA të rrisë normat bazë të interesit në nivele më të larta se sa pritej. Për këtë shkruan Glas Istra (GI), duke iu referuar Hinës.

Dow Jones humbi 0,11 për qind, në 33,890 pikë, ndërsa S&P 500 rrëshqiti 0,62 për qind, në 4,111 pikë, dhe indeksi Nasdaq humbi 1,0 për qind, në 11,887 pikë.

Aksionet ranë për të dytën ditë radhazi, pasi investitorët mbetën nën përshtypjen e të dhënave më të forta se sa pritej për tregun e punës në SHBA.

Të premten, u njoftua se në janar numri i të punësuarve në SHBA u rrit me 517,000, ndërsa analistët prisnin vetëm rreth 187,000. Nga ana tjetër, shkalla e papunësisë ra në 3.4 për qind, ndërsa pritej një rritje në 3.6 për qind, sipas GI.

Në fokus të investitorëve janë edhe rezultatet tremujore të biznesit të kompanive.

Edhe pse shumica e tyre raportojnë fitime më të mira se sa pritej, analistët në një sondazh të Reuters vlerësojnë se fitimet e kompanive nga indeksi S&P 500 ranë 2.8 për qind në tremujorin e fundit të vitit të kaluar krahasuar me të njëjtën periudhë të një viti më parë, shkruan Glas Istre.

Dje në bursat evropiane ranë edhe çmimet e aksioneve. Indeksi FTSE i Londrës u dobësua me 0,82 për qind, në 7,836 pikë, ndërsa DAX i Frankfurtit ra me 0,84 për qind, në 15,345 pikë, dhe CAC i Parisit ra me 1,34 për qind, në 7,137 pikë.

Këto të dhëna vunë në pikëpyetje vlerësimet e tregut për rritje të mëtejshme të normave të interesit nga banka qendrore e SHBA.

Edhe në mesin e javës së kaluar, investitorët shpresonin se Fed do të ngadalësonte dinamikën e rritjes së normave të interesit dhe se norma përfundimtare e interesit, pra norma e interesit me të cilën Fed do të përfundonte procesin e rritjes së çmimit të parasë, do të ishte më pak se 5 për qind.
Megjithatë, vlerësimet kanë ndryshuar. Kështu, tashmë në tregun e parasë pritet që Fed të vazhdojë të rrisë normat e interesit me 0.25 pikë përqindjeje dhe se norma përfundimtare e interesit mund të arrijë në 5.1 për qind deri në korrik.
“Pas raportit të vendeve të punës, investitorët duhet të rivlerësojnë perspektivën për ekonominë dhe normat e interesit të Fed”, tha Brian Jacobsen, strateg në Allspring Global Investments.

Ndaj investitorët presin se çfarë do të thonë zyrtarët e Fed në ditët në vijim, përfshirë edhe kryetarin e bankës qendrore, Jerome Powell, i cili do të mbajë një fjalim në njërën nga mbledhjet pasuese.[GN/ISHGJ]