Polonia filloi të krijojë ushtrinë më të fuqishme në Evropë

Polonia filloi të krijojë ushtrinë më të fuqishme në Evropë

Nga Mario Stefanov / Geopolitika.news, Zagreb

Që nga pushtimi rus i Ukrainës, Varshava ka nisur një program ambicioz për të transformuar praktikisht ushtrinë polake në ushtrinë më të fuqishme të NATO-s pas SHBA-së. Në të njëjtën kohë, ka një theks të rëndësishëm në forcimin e ushtrisë tokësore, e cila, sipas strategëve polakë, duhet të jetë në gjendje të zmbrapsë sulmin e forcave masive ruse.

Polonia planifikon të ndërtojë ushtrinë tokësore më të fuqishme në Evropë në dekadën e ardhshme. Krahas kësaj, Forcat Ajrore synojnë ta ngrenë atë në një nivel krejtësisht të ri duke përfshirë në arsenalin e saj avionët luftarakë amerikanë F-35. Në përgjithësi, sipas planeve të Varshavës, forcat e armatosura polake duhet të jenë ndër më të fuqishmet në kontinentin evropian.

Ministri polak i Mbrojtjes, Mariusz Blaszczak, njoftoi në fund të korrikut se, falë investimeve të shtuara të qeverisë në mbrojtje, Polonia shumë shpejt do të ketë forcat tokësore më të fuqishme në kontinentin evropian. Për këtë qëllim, sipas deklaratës së ministrit polak të mbrojtjes, Polonia e ka rritur buxhetin e mbrojtjes në tre për qind të PBB-së, një nga nivelet më të larta në NATO, dhe në të ardhmen e parashikueshme synon ta rrisë atë deri në pesë për qind të PBB-së.

Mbrojtja e atdheut

Polonia ka rritur vazhdimisht shpenzimet e saj ushtarake në dekadat e fundit dhe tashmë forcat e saj të armatosura janë ndër më të afta brenda NATO-s me një numër të madh tankesh moderne, mjete të blinduara luftarake dhe avionë luftarakë. Por, që nga pushtimi rus i Ukrainës, Varshava ka nisur një program ambicioz për të transformuar praktikisht ushtrinë polake në ushtrinë më të fuqishme të NATO-s pas SHBA-së. Në të njëjtën kohë, ka një theks të rëndësishëm në forcimin e ushtrisë tokësore, e cila, sipas strategëve polakë, duhet të jetë në gjendje të zmbrapsë sulmin e forcave masive ruse në hapësirat e hapura të “korridorit të luftërave” të njohur historikisht, më vonë edhe i quajtur “korridori i tankeve” ose “autostrada e tankeve”, në çdo situatë strategjike dhe operacionale.

Polonia është e vetëdijshme se në rast nevoje askush nuk do të hyjë në luftë për të nëse ajo vetë nuk i përballon goditjet e para dhe nuk mbron territorin e saj. Ndihma aleate është gjithmonë dytësore në luftëra, kurrë një faktor vendimtar dhe nuk mund të funksionojë nëse nuk ka një përgjigje të fortë ushtarake nga pala e sulmuar. Strategët polakë u besojnë aleatëve të tyre, mbi të gjitha aleatit të tyre strategjik SHBA-ve, por ata e dinë nga përvoja historike se, duhet të parandalojnë një luftë të mundshme në territorin e tyre, dhe nëse ndodh, të mbrohen në mënyrë efektive.

Menjëherë pas pushtimit rus të Ukrainës në mars, Polonia miratoi një ligj të ri për mbrojtjen e atdheut që parashikon dyfishimin e forcave të saj të armatosura në rreth 300,000 anëtarë. Në muajin maj, ajo filloi një formë të re të shërbimit vullnetar ushtarak me kompensim monetar për të motivuar anëtarësimin në Forcat e Armatosura dhe për të krijuar parakushte për rritjen e numrit të ushtarëve, kryesisht në forcat tokësore. Akti i Mbrojtjes së Atdheut e rriti buxhetin e mbrojtjes në tre për qind të PBB-së, duke e vendosur Poloninë brenda NATO-s menjëherë pas Greqisë, e cila shpenzon 3,82 për qind të PBB-së dhe SHBA-së, e cila shpenzon 3,52 për qind të PBB-së.

Një donator tjetër

Presidenti i partisë në pushtet, Jaroslaw Kaczynski, në fund të korrikut njoftoi se shpenzimet totale për mbrojtjen shumë shpejt do të arrijnë pesë për qind të PBB-së dhe në atë rast Polonia do të jetë rekordmene brenda NATO-s. Polonia aktualisht ka 114,000 anëtarë të ushtrisë, dhe objektivi i paracaktuar është 300,000. Për krahasim, Turqia ka 355,200 trupa, Franca 203,250, Gjermania 183,500, Italia 165,500, Britania e Madhe 148,500, Greqia 142,700, Spanja 122,850, Rumania 68,500 dhe Bullgaria 36,9. Këto 10 vendet e para të NATO-s kanë gjithsej 1.9 milionë ushtarë.

Plani i Varshavës është që, falë investimeve të reja të mëdha në ushtrinë polake, jo vetëm të rrisë në mënyrë sasiore forcat e armatosura, por edhe t’i modernizojë ato duke zëvendësuar armët dhe pajisjet e vjetra sovjetike, si dhe ato për Luftën e Ftohtë të prodhuara në Poloni me sistemet dhe pajisjet moderne të armëve me origjinë perëndimore.

Polonia deri më tani i ka dhuruar Ukrainës më shumë se 250 tanke të saj T-72 me origjinë sovjetike, si dhe një numër të madh tankesh PT-91 Twardy të prodhimit të saj, të cilët janë një modifikim polak i tankut T-72. Dorëzimi i këtyre armëve në Ukrainë përshtatet në procesin e riarmatimit të forcave të armatosura polake. Polonia është donatori i dytë më i madh i armëve dhe pajisjeve ushtarake për Ukrainën, menjëherë pas SHBA-së. Në qershor, presidenti polak Andrzej Duda shprehu besimin e tij se aleatët e Polonisë do të ndihmonin në plotësimin e boshllëqeve që rezultojnë në arsenalin polak, ndërsa ai akuzoi Gjermaninë se nuk iu përmbahet marrëveshjeve të mëparshme dhe se kishte thyer premtimin e saj për të zëvendësuar tanket që Polonia i dhuroi Ukrainës me Tanke gjermane Leopard. Nga ana tjetër, Berlini pretendon se keqkuptimi ka ndodhur për shkak se Polonia ka bërë kërkesa joreale për versionin më të ri të tankut Leopard 2, i cili sapo po futet në armatimin e ushtrisë gjermane. Kryeministri Mateusz Morawiecki paralajmëroi gjithashtu se Komisioni Evropian ka rënë dakord të rimbursojë një pjesë të madhe të kostove polake në lidhje me dërgimin e armëve në Ukrainë dhe se Varshava pret të përmbushë premtimin e saj.

Raundi i parë

Ndërkohë, ministri polak i Mbrojtjes për vizitën e tij në SHBA me Sekretarin Amerikan të Mbrojtjes Lloyd Austin ranë dakord për aq shumë marrëveshje për prokurimin e armëve dhe pajisjeve ushtarake nga SHBA-të, saqë ministri amerikan i Mbrojtjes deklaroi se ndihma amerikane do të mundësojë që “Ushtria polake të bëhet një nga më të aftat në Evropë”. Polonia ka kontraktuar me SHBA-në për të ofruar 32 avionë luftarakë amerikanë F-35 Lightning II dhe po negocion për të përmirësuar 48 avionët luftarakë F-16 që ka në nivelin e Glock 72. Polonia po kërkon gjithashtu një mënyrë për të zgjeruar numrin ekzistues flotën e avionëve luftarakë F-16, por problemi është se SHBA-të nuk mund të plotësojnë kërkesën për F-16 për momentin, sepse kanë ngadalësuar tërheqjen e tyre nga arsenali vtanak. Danimarka, për shembull, ka shtyrë gjithashtu uljen e numrit të avionëve F-16 në arsenalin e saj dhe Norvegjia do t’i dorëzojë F-16-tët e saj në Forcën Ajrore Rumune kur të marrë avionët luftarakë F-35 të porositur nga SHBA. Prandaj Polonia do ta ketë të vështirë të rrisë numrin e avionëve luftarakë F-16 në arsenalin e saj, por kjo është arsyeja pse ajo porositi 48 avionë luftarakë FA-50 nga Koreja e Jugut. Polonia ka rënë dakord me SHBA-në për të furnizuar 250 tanke të modernizuar M1A2 Abrams (SEPv3) me vlerë 1.15 miliardë dollarë. Gjithashtu u ra dakord për shitjen e sistemeve të raketave kundërajrore Patriot, raketahedhësve HIMARS dhe mjeteve ajrore pa pilot.

Në përputhje me planin sasior të forcimit dhe modernizimit, Polonia përfundoi me Korenë e Jugut, d.m.th. Hyundai Rotem Co. dhe Hanwa Corp., një kontratë 5.76 miliardë dollarësh për të blerë tanke K2-Black Panther dhe obus vetëlëvizës K9 me prodhim të planifikuar me licencë në Poloni. Në raundin e parë, kompanitë koreano-jugore do t’i dorëzojnë Polonisë 180 tanket e para dhe 48 aeroplan ushtarak tashmë këtë vit. Në fazën e dytë, deri në vitin 2026 është planifikuar dorëzimi i më shumë se 800 tankeve dhe 600 obuseve, disa nga prodhimi korean dhe disa nga prodhimi me licencë polake.

Aleati strategjik

Nuk ka dyshim se ekonomia polake në rritje dhe pozita gjeopolitike në të cilën ndodhet Polonia do të ndikojnë në realizimin e planeve të miratuara për modernizimin dhe forcimin sasior të forcave të armatosura polake. Në të njëjtën kohë, si më parë, partneri strategjik i Varshavës për pajisjen e ushtrisë polake do të jenë SHBA-të, ndërsa prodhuesit evropianë do të jenë në plan të dytë. Kjo sigurisht që shkakton pakënaqësi në Bruksel dhe Berlin, por bëhet fjalë për realizimin e vetë thelbit të doktrinës së mbrojtjes polake, sipas së cilës SHBA-të janë aleate strategjike e Polonisë dhe për këtë arsye kanë përparësi në lidhjen e marrëveshjeve të mbrojtjes me Poloninë.
Transformimi i planifikuar i ushtrisë polake në një nga më të fuqishmet në Evropë, është gjithashtu një reflektim i fuqisë dhe ndikimit gjeopolitik polak në rritje. [GN; përktheu: ISHGJ]