Intervistë: “Huawei nuk është Gazprom”

Kompania kineze Huawei është në thumb të kritikës. Anëtarët e Bundestagut duan ta detyrojnë kompaninë të largohet nga tregu gjerman. Një intervistë me përfaqësuesin e kompanisë.

Nga Tomasz Kurianowicz / Sophie-Marie Schulz[ 02.12.2023, Berliner Zeitung]

Huawei është një kompani kineze e teknologjisë që operon gjithashtu në Gjermani që nga viti 2001. Vitet e fundit ka pasur spekulime të përsëritura se qeveria kineze po përdor kompaninë si një ndërmjetëse për të spiunuar në Evropë dhe për të aksesuar të dhënat duke përdorur teknologjinë kineze të instaluar. Huawei i mohon akuzat. Ne folëm me Carsten Senz dhe Patrick Berger në zyrën e Huawei në Berlin. Të dy punojnë si zëdhënës të kompanisë në Huawei.

Berliner Zeitung: Zoti Senz, Huawei është kritikuar për më shumë se këtë vit. Ndërkohë, megjithatë, debati politik për punën e kompanive kineze në Gjermani është intensifikuar në mënyrë drastike. Në qershor, Komisioni Evropian i klasifikoi dy kompanitë kineze Huawei dhe ZTE si të rrezikshme për sigurinë e BE-së. Përveç kësaj, nga viti 2026 e në vazhdim, teknologjitë kineze nuk do të instalohen më në rrjetet celulare gjermane. Prandaj, zgjerimi i rrjetit 5G duhet të bëhet pa komponentë nga Huawei. Si reagoni për këtë?

Carsten Senz: Duhet të bëni përdallimin e nevojshëm: Ka zona të ndryshme në rrjetin celular. Nga njëra anë, rrjeti kryesor, i cili konsiderohet kritik. Dhe pastaj ekziston i ashtuquajturi rrjet i antenave. Ky i fundit njihet edhe si rrjeti i aksesit. Komponentët Huawei janë instaluar kryesisht në rrjetin e antenave në Gjermani. Teknologjia jonë nuk përdoret më në rrjetin bazë të rrjetit të komunikimit celular, i cili konsiderohet kritik. Ne kryesisht furnizojmë antena dhe stacione bazë për zgjerimin e rrjetit 5G. Ajo që na godet gjithmonë dhe na acaron në diskutim është se rrjeti i antenave shpesh diskutohet me pak njohuri teknike. Antenat e instaluara në të janë antena “memece”. Ato thjesht përcjellin paketa të dhënash shumë të koduara në një drejtim specifik. Huawei gjithashtu nuk ka qasje në këto të dhëna sepse rrjeti është në pronësi, kontroll dhe menaxhim të operatorëve celularë. Ende ka një akuzë se qeveria kineze mund ta përdorë atë për të kryer spiunazh. Kjo është e pakuptimtë. Nuk ka asnjë mënyrë për të vlerësuar të dhënat përmes antenave që instalojmë. Për të qenë të qartë: Ne nuk kemi mundësinë për të hyrë në të dhënat në rrjetet celulare gjermane. Akuzat e përsëritura për spiunazh të supozuar janë të pakuptimta.

Patrick Berger: Ne jemi thjesht një furnizues i pajisjeve, jo operator i rrjeteve celulare. Së bashku me shumë furnizues të tjerë nga Evropa dhe SHBA, ne furnizojmë vetëm komponentë: antenat për rrjetin e telefonisë celulare. Rrjetet janë në pronësi dhe kontrollohen plotësisht nga operatorët e rrjetit: Deutsche Telekom, Vodafone dhe Telefónica, të cilët mbrojnë rrjetet e tyre me masa gjithëpërfshirëse sigurie.

Senz: Huawei ka qenë një furnizues shumë i besueshëm për rrjetin e antenave jo kritike për shumë vite. Nëse shikoni rregulloren që po diskutohet aktualisht, bëhet dallimi midis komponentëve kritikë dhe komponentëve jokritikë në rrjetin celular. Nëse një operator rrjeti përdor një komponent të tillë kritik, pavarësisht nga prodhuesi, atëherë ai duhet ta raportojë këtë tek autoritetet përgjegjëse. Në rrethana të caktuara, qeveria mund të ndalojë një përdorim të tillë. Pavarësisht nga kjo, BSI, Zyra Federale për Sigurinë dhe Teknologjinë e Informacionit, do të kontrollojë komponentët kritikë për boshllëqe të mundshme të sigurisë si pjesë e një procesi certifikimi. Nëse e kuptojmë saktë, kur bëhet fjalë për Huawei, është thjesht një komponent relativisht i vogël që mund të jetë kritik. Por a është ky komponent vërtet kaq kritik? Deutsche Telekom tashmë ka deklaruar publikisht se furnitorët si ne nuk kanë akses në këtë komponent kritik gjatë funksionimit normal të rrjetit. Dhe në përputhje me rrethanat, ne nuk mund të qasemi në asnjë të dhënë ose të përfshihemi në ndonjë lloj tjetër sabotimi ose spiunazhi nëpërmjet këtij komponenti. Në fakt, ju duhet ta pranoni këtë përpara se ta diskutoni.

Pra, sipas jush, kritikat janë krejtësisht të pabazë?

Berger: Po. Kushdo, taksativisht kushdo, që e kupton teknologjinë do t’ju thotë se për shkak të natyrës së antenave të celularëve, ne nuk kemi akses në të dhëna. Përpunimi i të dhënave bëhet gjithmonë nëpërmjet rrjetit bazë të operatorit të rrjetit përkatës. Teknikisht, aksesi i të dhënave përmes antenave është i pamundur, për shkak të nivelit të lartë të enkriptimit që ekziston në këtë pjesë të rrjetit.

Nuk duhet të jetë befasi që Gjermania dëshiron të mbrojë infrastrukturën e saj kritike nga ndërhyrjet e jashtme.

Senz: Sigurisht që jo. Të gjithë duan të mbrojnë komunikimet dhe infrastrukturën e tyre. Skepticizmi është fillimisht një gjë e mirë. Një analizë e plotë e rrezikut, veçanërisht në lidhje me sigurinë e rrjetit, është e rëndësishme. Megjithatë, kur bëhet një analizë kritike, duhet t’i referohemi fakteve. Dhe fakti është se ne nuk kemi akses në të dhëna. Në diskutimin publik përcillet foto e mëposhtme: Një kompani kineze, së bashku me shumë kompani të tjera, furnizon disa komponentë dhe më pas qeveria kineze kontrollon të gjithë rrjetin gjerman. Kjo është naive. Në realitet, këta komponentë janë të izoluar dhe ne nuk kemi akses në to gjatë funksionimit.

______________________________________________________________________________

Patrick Berger është Ii lindur në vitin 1977 në Heidelberg. Ai punon me vite të tëra si zëdhënës i ndërmarrësit Huawei në Gjermani.

________________________________________________________________________________

Në këtë kontekst, po flasim për harduerin, softuerin apo të dyja?

Berger: Për të dyja. Ne furnizojmë antenën, e cila natyrisht kontrollohet nga softueri. Rastësisht, ekipi ynë i kërkimit të antenave në Mynih po zhvillon gjithashtu teknologjinë, pasi qendra jonë më e madhe evropiane e kërkimit ndodhet atje. Prandaj, këto produkte janë gjithashtu “Made in Germany”. Kjo duhet të merret parasysh edhe në diskutimet politike.

Telefonat Huawei janë sanksionuar pjesërisht në SHBA. Keni frikë se Bashkimi Evropian do të sanksionojë të gjithë kompaninë dhe zgjerimin e rrjetit duke përdorur teknologjinë Huawei?

Senz: Nuk flitet për këtë për momentin. Shpresojmë që autoritetet përgjegjëse të shqyrtojnë gjithçka me kujdes dhe faktet e nevojshme të futen në debat. Ne kemi punuar ngushtë dhe në mënyrë transparente me këto autoritete të specializuara për shumë vite. Për shembull, ne ishim një nga kompanitë e para në industrinë tonë që ua zbuluam burimin e kodit autoriteteve gjermane. Këtë nuk e kemi bërë vetëm një herë, por e bëjmë gjatë gjithë kohës. Për këtë qëllim, ne kemi ngritur një të ashtuquajtur “Security Innovation Lab” në Bon, ku ndodhet edhe BSI. Softueri ynë dhe gjithçka tjetër mund të ekzaminohen nga afër. Përveç kësaj, autoritetet gjermane madje kanë akses në aktivitetet kërkimore që po zhvillohen në Kinë, për shembull. Ne i përgjigjemi akuzave me një nivel të lartë transparence dhe kërkojmë trajtim të drejtë.

Është raportuar në Handelsblatt se Deutsche Bahn-it [Hekurudhës Gjermane] do t’i kërkohet gjithashtu me ligj të heqë dorë nga teknologjia nga Huawei. Sekretari i Përgjithshëm i NATO-s, Jens Stoltenberg, thuhet gjithashtu se ka paralajmëruar Gjermaninë për Huawei.

Senz: Nuk mund të themi asgjë për këtë. Nuk jam në dijeni të ndonjë lajmi nga qeveria federale që e kanë konfirmuar këtë deri më tani.

Por nuk është hera e parë që qeveria federale ka ekzaminuar kompaninë dhe ka shprehur shqetësimin e saj për rreziqet e mundshme në lëmin e sigurisë. Ato nuk mund të trajtohen si të paqena.

Senz: Nuk ka as akuza konkrete për keqbërje, e lëre më prova. Ne kemi qenë aktivë në më shumë se 170 vende për më shumë se 30 vjet dhe nuk kemi pasur asnjë incident të rëndë sigurie. Për shembull, përpara se teknologjia Huawei të përdorej për herë të parë në një rrjet celular në Gjermani, operatorët e rrjetit na testuan për shumë vite. Ishte test shumë, shumë i plotë. Jo vetëm produktet tona janë ekzaminuar dhe ekzaminohen rregullisht, por edhe selia jonë në Shenzhen. U vizituan fabrikat tona të prodhimit në Kinë; proceset e zhvillimit, kërkimit dhe prodhimit u ekzaminuan dhe sigurisht zinxhirët e furnizimit deri në strukturën tonë të korporatës. Me fjalë të tjera, ne u kontrolluam plotësisht për shumë vite derisa erdhi bashkëpunimi i parë. Dhe me çdo tender të ri, aspekte të panumërta të sigurisë kërkohen dhe kontrollohen vazhdimisht.

Atëheër, pse akuzat bëhen përsëri dhe përsëri?

Senz: Sepse ne jemi një kompani kineze dhe për këtë arsye kemi qenë gjithmonë nën vëzhgim të veçantë. Ne jemi të vetëdijshëm për këtë dhe i përgjigjemi me transparencë, bashkëpunim dhe proceset tona strikte të pajtueshmërisë dhe sigurisë. Vini re: Ne kemi një total prej më shumë se 3000 furnizues nga e gjithë bota, jo vetëm nga Kina, por edhe nga Evropa, Japonia dhe Amerika. Para sanksioneve atje, 30 për qind e komponentëve tanë furnizues vinin nga SHBA. Konkurrentët tanë nga Evropa kanë afërsisht të njëjtët zinxhirë furnizimi. Vetëm kjo tregon se nëse vërtet dëshironi të ngrisni siguri në industrinë tonë, duhet të kontrolloni të gjithë pjesëmarrësit në treg, i cili është pjesë e menaxhimit të zinxhirit tonë të furnizimit. Një gjë që mund të them është se Huawei është kompania më e audituar në industrinë tonë.

Varësia nga gazi rus ka bërë që qeveria federale të luajë skenarin më të keq në nivele dhe sektorë të tjerë. A mund ta kuptoni pse njerëzit në Gjermani preferojnë të mbështeten te një partner tregtar evropian, pra perëndimor, për të shmangur skenarin e Gazprom-it në segmentin e antenave?

Senz: Huawei nuk është Gazprom. Antenat nuk janë gaz. Krahasimi, nëse doje ta shprehje në detaje, është i gabuar në pothuajse çdo aspekt.

Vërtet?

Senz: Nëse antenat dhe gazi barazohen, sipas mendimit tonë po bëhet një gabim logjik: Njerëzit gjithmonë sillen sikur Huawei është furnizuesi i vetëm i teknologjisë 5G në Gjermani. Të gjithë operatorët gjermanë të rrjetit mbështeten në një grup të madh furnizuesish që vijnë nga Evropa, Amerika e Veriut dhe Azia. Për më tepër, të gjithë operatorët e rrjetit kanë menaxhim të rrezikut të menduar me kujdes, i cili përfshin, për shembull, rezervimin e pjesëve rezervë. Kjo do të thotë se nëse një kompani papritmas ndërpret furnizimin me antena për çfarëdo arsye, kjo fillimisht nuk do të kishte praktikisht asnjë ndikim në rrjetin celular gjerman. Operacionet do të vazhdonin. Ky është një ndryshim i madh me mungesën e furnizimeve të gazit natyror. Ndalimi i furnizimit me antena do të dëmtonte vetëm veten tonë. Në rastin më të keq, ne nuk mund të shkyçnim ose ndalnim thjesht antenat Huawei, siç është rasti me gazin. Në terma thjesht racionalë, teknologjia e mësipërme Huawei nuk ka kuptim.

BE-ja dhe SHBA-ja duan t’u japin përparësi kompanive të tyre. A mund të konsiderohet kjo një arsye racionale?

Senz: Para së gjithash, sigurisht që nuk është racionale të heqësh dorë nga ofruesi me teknologjinë kryesore dhe më efikase në energji dhe shërbimin më të mirë. Kjo është ajo për të cilën ne jemi të njohur në industri. Dhe pastaj ju duhet të shikoni se si industria jonë punon së bashku globalisht. Në këtë kontekst, duhet përmendur se risitë dhe teknologjia sot nuk do të ishin të mundshme pa bashkëpunimin dhe konkurrencën globale. Konkurrentët tanë evropianë jo vetëm që përfitojnë nga prodhimi dhe tregu i shitjeve në Kinë, por gjithashtu operojnë qendra të mëdha kërkimore atje me mijëra punonjës. Kjo është arsyeja pse ne në Huawei mbrojmë vazhdimin e këtyre bashkëpunimeve në të ardhmen. Bota është e lidhur pazgjidhshmërisht në sektorin e teknologjisë. Vazhdimi i bashkëpunimit mes Kinës dhe Perëndimit nuk është vetëm në interes të Kinës, por edhe në interes të konkurrentëve evropianë. Ata të gjithë kanë nevojë për tregti dhe kontakt me Kinën. Rreziqet e lidhura duhet dhe mund të menaxhohen pa e hedhur fëmijën jashtë me ujin e banjës.

________________________________________________________________________________

Carsten Senz lështë i lindur në vitin 1974 dhe u rrit në Neunkirchen (Saar). Ai jeton me gruan dhe dy fëmijët e tij në Düsseldorf. Pasi studioi Sinologjinë dhe Studimet Japoneze në Trier, Wuhan dhe Tokio me fokus në historinë intelektuale dhe komunikimin ndërkulturor, Senz punoi si konsulent në projekte të shumta të zhvillimit ekonomik dhe marketingut me seli në provinca dhe komuna të ndryshme në Kinë që nga viti 2002 e tutje. Që nga nëntori 2018, ai ka qenë përgjegjës për departamentin e përgjithshëm të komunikimit të korporatës të Huawei -t në Gjermani.
________________________________________________________________________________

Ata thonë se arsyet për shmangien e teknologjisë Huawei nuk janë racionale. Sipas mendimit tuaj, cilat janë arsyet e vërteta për kritikat ndaj Huawei? A është Bundestagu thjesht i informuar dobët?

Senz: Sfondi është mjaft i thjeshtë. Ka emocione të forta që mund të vërehen në shumë fusha tani. Për shkak të origjinës sonë, ne jemi vënë nën një dyshim të përgjithshëm që në fakt është i pabazuar. Ne jemi një kompani mjaft emocionuese dhe kemi shumë për të ofruar. Unë mbroj pikëpamjen që Huawei të shikohet në mënyrë të drejtë, racionale dhe pa paragjykim. Ne i ofrojmë të gjithëve mundësinë për ta bërë këtë. Besimi mund të krijohet vetëm nëse jeni transparent. Ajo që na duhet është një analizë racionale e rrezikut dhe jo një ndjenjë e brendshme. Dhe më pas ju mund të punoni me ne në shumë fusha të rëndësishme si dixhitalizimi dhe mbrojtja e klimës. Kemi vite që diskutojmë këtu në Gjermani për faktin se asgjë nuk po bën përparim në dixhitalizim. Në të njëjtën kohë, ata duan të punojnë me një nga kompanitë kryesore të zhvillimit të teknologjisë, Huawei, por vetëm në një masë të kufizuar. Në fushën dixhitale, ne jemi deri tani kompania që lë gjurmë gjithandej. Kompanitë nga të gjitha industritë në mbarë botën përdorin teknologjinë tonë në shumë fusha për të arritur ndryshime dixhitale. Ne jemi partneri ideal plotësues për kompanitë gjermane në shumë industri tradicionale për të cilat Gjermania është bërë kaq e njohur. Strategjia jonë është bashkëpunimi me të gjitha industritë dhe të gjithë sektorët për t’i përgatitur për sfidat e së ardhmes me shumë procese të reja prodhimi dhe modele biznesi. Ne nuk bëjmë politikë, ne duam përparim teknologjik dhe rritje të përbashkët të tregjeve.Për ta thënë thjesht: Ne nuk duam të marrim të gjithë tortën, por përkundrazi ta bëjmë tortën më të madhe së bashku në mënyrë që të gjithë të kenë më shumë.

A jeni vërtet kaq i qetë për hetimin e BSI-së? Le të supozojmë se Bundestagu pyet BSI-në për sigurinë e Huawei? A do të jetë vendimi pozitiv?

Senz: Po, jam i sigurt për këtë. Ne kemi besim në kompetencën teknike të BSI-së. Ju lutemi mos ngurroni të pyesni BSI-në nëse ata janë në dijeni të ndonjë problemi me teknologjinë Huawei.

Keni ende frikë nga një ndalim i plotë?

Senz: Ligjërisht, vetëm përdorimi i komponentëve kritikë nga Huawei mund të ndalohet. Megjithatë, ne nuk jemi të përfshirë në proces dhe për këtë arsye nuk i dimë detajet. Megjithatë, ne kemi besim se mund të vazhdojmë të japim kontributin tonë në pozicionimin e Gjermanisë për një të ardhme dixhitale dhe të qëndrueshme.

Shumë vëzhgues në Gjermani akuzojnë Huawei si një kompani shtetërore.

Senz: Kjo nuk është e saktë. Nuk e di saktësisht se si vjen ky trillim. Megjithatë, në Evropë, shumica duket se beson se gjithçka në Kinë është e drejtuar nga shteti, gjë që nuk është e vërtetë. Më shumë se 50 për qind e ekonomisë kineze dominohet nga kompanitë private. Struktura në Huawei është veçanërisht inovative sepse ne jemi një kompani private që nuk është e listuar në bursë. Megjithatë, ne nuk jemi biznes familjar, kompania është e punonjësve. Aksionet në kompani mund t’u shiten vetëm punonjësve të kompanisë; ky ka qenë rasti që nga fundi i viteve 1990. Aktualisht kemi një total prej 207,000 punonjësish, dhe nga këta, më shumë se 140,000 punonjës mbajnë aksione në kompani. Themeluesi ende mban pjesën më të madhe të aksioneve me 0.64 për qind.

A ka një drejtor kompanie apo person përgjegjës për vendimmarrje?

Senz: Sistemi i brendshëm është demokratik. Bordi zgjidhet çdo pesë vjet nga punonjësit që kanë aksione. Përveç kësaj, nuk ka vetëm një CEO, por tre. Këta tre CEO, aktualisht dy burra dhe një grua, ndërrohen çdo gjashtë muaj. Vendimet merren së bashku.

Pra, struktura është e krahasueshme me një kooperativë?

Senz: Pak a shumë, por një kooperativë në përgjithësi nuk është një kompani. Është një shoqatë e ofruesve individualë në një industri. Ne, nga ana tjetër, jemi një kompani. Ky është ndryshimi thelbësor.

A ju ka paraqitur ndonjëherë Qeveria Federale Gjermane, BSI ose ndonjë autoritet tjetër federal gjerman prova apo ka gjetur prova se Huawei është ose ka kryer spiunazh?

Senz: Nuk mund të ketë prova të tilla sepse ne nuk e bëjmë atë.

[Përktheu: ISHGJ]