Këshilltari amerikan për sigurinë kombëtare takohet me kreun e diplomacisë kineze

[26 janar, 2024]

Këshilltari i Sigurisë Kombëtare i SHBA-së, Jake Sullivan, do të takohet me ministrin e Jashtëm kinez Wang Yi në Bangkok sot dhe nesër, ndërsa liderët amerikanë dhe kinezë bien dakord të thellojnë dialogun midis dy ekonomive më të mëdha në botë, raporton Reuters.

Takimi zhvillohet pak më shumë se dy muaj pas takimit katërorësh midis presidentit amerikan Joe Biden dhe homologut të tij kinez Xi Jinping në margjinat e samitit të Bashkëpunimit Ekonomik Azi-Paqësor (APEC) në San Francisko. Më pas Biden dhe Xi ranë dakord të hapnin “vijën e kuqe” presidenciale, të rivendosnin komunikimin midis dy ushtrive dhe të përpiqeshin të zvoglonin prodhimin e fentanilit, por çështja e Tajvanit mbeti e hapur.

Ruajtja e komunikimit strategjik

“Ky takim bazohet në marrëveshjen e Presidentëve Biden dhe Xi në nëntor në takimin e Woodside për të ruajtur komunikimin strategjik dhe për të menaxhuar me përgjegjësi marrëdhëniet,” tha zëdhënësja e Këshillit të Sigurisë Kombëtare të Shtëpisë së Bardhë, Adrienne Watson.

Takimi në Bangkok u konfirmua në një deklaratë nga Ministria e Punëve të Jashtme kineze. “Siç është rënë dakord mes Kinës dhe Shteteve të Bashkuara, Wang Yi do të mbajë një raund të ri takimesh me Këshilltarin e Sigurisë Kombëtare të SHBA-së, Jake Sullivan në Bangkok”, thuhet në deklaratë.

Sullivan, shtoi Watson, do të takohet gjithashtu me kryeministrin tajlandez Srettha Thavisin dhe zëvendëskryeministrin Parnpree Bahiddha-nukar në Bangkok. “Në këto takime, zoti Sullivan do të ripohojë rëndësinë e Aleancës dhe Marrëveshjes së Partneritetit SHBA-Tajlandeze dhe do të diskutojë mundësitë për të forcuar bashkëpunimin në një sërë çështjesh dypalëshe dhe globale,” tha Watson. [GN/ISHGJ]