Një tentativë për grusht shteti të stilit Maidan po planifikohet në Beograd, pohon ambasadori rus

Një tentativë për grusht shteti të stilit Maidan po planifikohet në Beograd, pohon ambasadori rus

Zagreb/Prishtinë, 31 maj 2023 – Kundërshtarët e presidentit serb Aleksandar Vuçiq po përpiqen të organizojnë një grusht shteti në stilin e Maidan-it (Sheshi qendror i Pavarësisë në Kiev, ku filluan trazirat antiqeveritare), tha ambasadori rus në Serbi, Aleksander Botsan Harchenko.

“Kjo është pjesë e luftës hibride. Dëshiroj të theksoj se forcat antiqeveritare vepruan pothuajse të sinkronizuara dhe po veprojnë në dy fronte – kjo është situata në Kosovë dhe tentativa për grusht shteti në Maidan këtu në Beograd”, tha ai, përcjellë TASS-i rus. Më 28 maj në Beograd u mbajt njëri nga tubimet më të mëdha antiqeveritar në vitet e fundit. Protestuesit u mblodhën pranë ndërtesës së Televizionit Kombëtar të Serbisë. Ishte protesta e katërt në muajin e fundit.

Duke pasur parasysh se Moska vazhdimisht pretendon se protestat e vitit 2014, kur Ukraina filloi t’i kthente shpinën Moskës, në fakt ishin të orkestruara nga Perëndimi, është e lehtë të merret me mend se ambasadori rus beson se protestat aktuale në Serbi kanë një sfond të ngjashëm.

Demonstratat nën slloganin “Serbia kundër dhunës” paraprakisht u mbajtën në Beograd më 8, 12 dhe 19 maj pas dy të shtënave me armë zjarri që ndodhën në ditë radhazi në vend më 3 dhe 4 maj. E para ishte të shtënat në një shkollë në Beograd, dhe më pas të nesërmen, kur një njeri i armatosur vrau tetë dhe plagosi 14 vetë në Mlladenoc. Qytetarët kërkuan dorëheqjen e ministrit të Brendshëm, Bratislav Gashiq [në detyrë që nga 26 tetori 2022] dhe shefit të Agjencisë për Siguri dhe Informacion, Aleksandar Vulin. Përveç kësaj, protestuesit këmbëngulën që disa media pro-qeveritare që propagandojnë dhunën dhe urrejtjen, duhet të mbyllen.

Tubimi i parë ishte mjaft paqësor, pa shumë sllogane kundër qeverisë. Njerëzit thjesht u mblodhën në heshtje para ndërtesës së parlamentit. Gjatë tubimit të dytë, protestuesit bllokuan urën mbi lumin Sava dhe brohoritën parulla kundër qeverisë. Demonstrata e tretë kishte karakter antiqeveritar. Edhe kjo e fundit u shqua për frymën e saj antiqeveritare. [GN/ISHGJ]