Pranimi i Suedisë në NATO: Ministri i Punëve të Jashtme kujtoi premtimin e rëndësishëm të Hungarisë

[25 janar, 2024]

Kryeministri suedez Ulf Kristersson i ka ofruar homologut të tij hungarez Viktor Orban një takim në Bruksel javën e ardhshme për të diskutuar për kërkesën e Suedisë për anëtarësim në NATO dhe çështje të tjera dypalëshe, tha të enjten qeveria suedeze.

Në një letër drejtuar kryeministrit Orban, Kristersson shkroi se do të pranonte gjithashtu një ftesë për një takim në Budapest “në një kohë të përshtatshme për ne të dy”. “Unë jam dakord të kemi një dialog më intensiv midis vendeve tona dhe se ai do të ishte i dobishëm”, thuhet në letrën e Kristersson.

Suedia aplikoi për anëtarësim në NATO në vitin 2022 pas pushtimit rus të Ukrainës, por u ndalua në rrugën e saj nga Turqia dhe Hungaria. Të martën parlamenti turk i dha dritën jeshile aplikimit suedez dhe presidenti Rexhep Tajip Erdogan pritet të shtojë nënshkrimin e tij në ditët në vijim. Kjo do ta lë Hungarinë si të vetmin anëtar të NATO-s që nuk e ka miratuar anëtarësimin e Suedisë.

Të martën, Orban ftoi Kristersson në Budapest për negociata mbi bashkimin e vendit të tij në bllokun ushtarak. Radio Evropa e Lirë raportoi më pas se ministri i jashtëm suedez e refuzoi ftesën, duke thënë se ai “nuk sheh asnjë arsye për të negociuar në këtë moment”. Parlamenti hungarez është në pushim nga seanca e tij deri në mes të shkurtit. Turqia dhe Hungaria kultivojnë marrëdhënie më të mira me Rusinë sesa anëtarët e tjerë të Organizatës së Traktatit të Atlantikut të Veriut.

Hungaria nuk po nxiton

Presidenti i parlamentit hungarez tha të enjten se nuk ka urgjencë për miratimin e anëtarësimit të Suedisë në NATO dhe pas ratifikimit turk, Budapesti mbetet i vetmi që pengon procesin e anëtarësimit. Pranimi i Suedisë kërkon miratim zyrtar nga që të 31 vendet anëtare, përfshirë Hungarinë, por miratimi i Turqisë në përgjithësi shihej si pengesa më e madhe e mbetur për t’u kapërcyer.

Kryeministri hungarez Viktor Orban, i cili ka marrëdhënie miqësore me presidentin rus Vladimir Putin, pavarësisht luftës së Moskës në Ukrainë, tha të mërkurën se, do t’u kërkonte ligjvënësve të miratonin pranimin e Suedisë në rastin e parë të mundshëm.

Parlamenti aktualisht nuk ka seanca. Partia Socialiste e opozitës tha se do të thërriste një seancë urgjente për të miratuar ofertën e Suedisë për t’u bashkuar me NATO-n, e cila ka ngecur në legjislaturën e Hungarisë që nga mesi i vitit 2022, pavarësisht premtimeve të përsëritura të Orban-it për ta mbështetur atë.

“Unë nuk kam dyshim se një nga partitë opozitare – e cila vazhdimisht ka shkuar kundër interesave hungareze – do të thërrasë për një seancë (të jashtëzakonshme), por ndoshta nuk do të funksionojë,” tha Laszlo Kover, një anëtar i Fidesz-it të Orbanit, siç citohet sipas indeksit.hu. “Nuk ndjej ndonjë urgjencë të veçantë. Për më tepër, nuk mendoj se ka një situatë emergjente”, shtoi ai.

Premtimi hungarez

Sekretari i Përgjithshëm i NATO-s, Jens Stoltenberg i kërkoi Orban-it të mërkurën që të ratifikojë pranimin e Suedisë në aleancë.

Ministri i Jashtëm suedez, Tobias Billstrom, tha të enjten se ai supozoi se Hungaria ishte në dijeni se më parë kishte thënë se nuk do të ishte anëtari i fundit i NATO-s që ratifikonte kërkesën e Suedisë për t’u bashkuar me aleancën e mbrojtjes, raportoi e përditshmja Aftonbladet. “Unë supozoj se pala hungareze është e vetëdijshme për premtimet e bëra për botën e jashtme, se nuk duhet të jeni i fundit që ratifikon Suedinë”, citohet të ketë thënë ministri i Jashtëm Tobias Billstrom. [GN/ISHGJ]