Trazirat në Shën Petersburg: A po humbet kontrollin Putini?

Trazirat në Shën Petersburg: A po humbet kontrollin Putini?

Konflikti i Kremlinit me trupat Wagner kthehet në një luftë të pashembullt për pushtet. Perëndimi i ndjek me vëmendje zhvillimet në Rusi.

Ushtria ruse duhet të ndërmarrë veprime kundër mercenarëve Wagner në disa vende. Pas Moskës, situata është e tensionuar edhe në Shën Petersburg dhe Voronezh.

Në Rusi me sa duket ka trazira edhe në Shën Petersburg: Njësitë e armatosura të ushtrisë kanë rrethuar ndërtesën e zyrës së mercenarëve Walgner, raporton RIA Novosti. Agjencitë e zbatimit të ligjit në Shën Petersburg thanë se “ata po monitorojnë situatën me autoritetet e qytetit dhe masat e sigurisë në qytet janë forcuar”. Njoftimi vjen nga shërbimi për shtyp i administratës së qytetit, sipas agjencisë shtetërore ruse të lajmeve Tass. “Situata në Shën Petersburg është e qetë dhe nën kontroll. Guvernatori Alexander Beglow është në kontakt të vazhdueshëm me shefat e zbatimit të ligjit të qytetit. Masat më të rrepta të sigurisë vazhdojnë të zbatohen në Shën Petersburg”, tha shërbimi i shtypit.

Para kësaj, situata midis mercenarëve Wagner dhe ushtrisë ruse ishte përshkallëzuar. Në një fjalim, të emetuar të shtunën në mëngjes, presidenti rus Vladimir Putin foli për mundësinë e një “lufte civile” që duhet parandaluar. Kjo zgjedhje fjalësh është e pazakontë, pasi qeveria ruse gjithmonë ka theksuar se popullsia qëndron pas luftës kundër Ukrainës. Në Moskë, qytetarët e parë tashmë duket se po paketojnë valixhet për t’u larguar nga qyteti.

Sipas New York Times, shërbimi i inteligjencës ushtarake britanike e përshkroi krizën si “sfida më e madhe për shtetin rus në kohët e fundit”: “Në orët në vijim, besnikëria e forcave ruse të sigurisë dhe në veçanti e Gardës Kombëtare Ruse do të të jetë vendimtare për rrjedhën e krizës”.